2022-06-20 00:20:18
壮族原生态山歌-唐皇调-第一段
(壮文歌词)
Raeuz lwnh ciengx lwg muzlienh ging
Mwh gonq sam gaiq sam vuengz caeq
Gwq gonq seiq gaiq seiq vuengz caux
Vuengz de caux dieg dauq caux deih
Vuengz de caux ranz dauq caux diengz
Dieg ndei dieg gvangq hwnj go gauj
Biengz laux biengz hung hwnj go lungz
Gwnz mbwn sangsang caux ndaundeiq
Ciuh gonq biengz boux caux lwgvunz
De naeuz boux daiq boux baeuq yauq
De hawj boux lij boux gaemh cai
Bauq naeuz hawj gaiq raeuz ciuh neix
Goj naeuz hawj lwglan ciuh laeng
Gvaq gonq vunz lai dawz maz beij
Daeuj daengz ciuh neix dawz maz lwnh
Lwnh boh lwnh meh raeuz sinhoj
Gaiqraeuz guh lwg geiqnienh de
Yaek aeu mij dauh leix daeuj gingq
Mwh gonq meh raeuz ciengx lwg cing
De goj lau daemz nding daemz gangh
Lau heiq ngoenz neix vaq bae yaemz[1]
Meh dai ngoenz neix baenz lan cienh
Guh lwg mehmbwk goj rox ngamz[2]
Ganq seiz hwnj bae bo lingx canx
Ganq hwnj bae sae dienh cingj gingq
Bae cam aeu bonj gingq vaiz dai
Gwq de diemj hawj gingq muzlienz
Haemh neix hawj vunz lai daeuj haiq
Geij baiz sawgingq goj dungxdoengz
Gaiq raeuz gangj mbouj lau saek loih
Ok daeuj raeuz goj gangj vunz gyang
Saw gingq cienz hawj boux laj deih
Gingq coux dangq boux geiq baez laeng
Daengz biengz vunz lai dawz daeuj ciengq
Bonj neix cingq dwg gingq muzlienz
Couxyah bouxsai goj rox ndeq
Hwnz neix doeg gingq youq henz sangh
Vunzlai boux boux nienh ndaej geiq
Goj ndaej geiq nienh daengz bonj gingq
Gaiq raeuz mbouj lau hwnz ndij rongh[3]
Muengh hwnz neix doeg gingq vanz aen[4]
Gvaq laeng vunz lai goj mbouj rox
Gvaq laeng ndiep hoj boux lawz raen
Miz ngaenz miz cienz goj dwg gyaj
Hwnz neix dwg suenq hwnz gaiqmaz
Bouxmeh laep da bak mbouj gangj
Bauq mingz bauq coh bae ndij sien
Cien bi fanh sej youq yinx genh
Meh youq baih yangz laep mbouj raen
De goj baen ce mbwn ndij namh
De goj byag lwg dauq byag cing
Daemz sang daemz gvangq meh nanh gyanh
Vunz cam yiengh lawz goj mbouj deng
Miz doeg miz rengz goj mbouj ndaej[5]
Gwnz mbwn de soengq hawj couh baenz[6]
Miz ngaenz miz cienz deij mbouj ndaej
Miz lwg miz cing cingq couh bengz
Gaiq raeuz yieh mbouj noix saek yiengh
Ndaej ciengx lwg mbwk ndij lwg sai
Lwg sai de cix rox ngoenz ciengx
Lwg mbwk de cix deq ngoenz dai
Ndaej deq lwg sai gwn saek sauh
Ndaej ciengx lwg laux goj dauq daeuz
Gwq gonq ciengx lwg cingq cap heiq
Lau heiq lwg iq haeux mbouj gwn
Ninz roengz daeuj goj mbouj rox ndeq
Goj baenz gyaeuj dok dauq da raiz
Nyaq raen lwg iq baenz haeuj bingh[7]
Yaek bae suenq mingh ra canghyw
De bae ndij laux sae daz gvaiq[8]
Baiz noh gyaeuz baeuqyah ndaw ranz
De lij soengq fangz sieng baih rog
Cang yieng gyaeuz mehlaux uenj va[9]
Hawj baed hawj sien daeuj ndij bauj
Naeuz ndij baed ranz bauq cojcoeng
Bauj hawj lwg raeuz ndang bingh caeuh[10]
Aeu mou aeu yiengz daeuj vanz aen
Meh muengh lwg bingh ndei rox mbouj
Aeu mak aeu bingj dawz bae baiz
Miz sim soengq hawj baed sien haiq
Miz gim miz ngaenz soengq bae riengz
Meh nyaq raen lwg baenz saek it
Gangq seiz dajsuenq ra ngaenz cienz
Bae haw cawx bit youh cawx gaeq
Dawz bae caeq meh laux goek va
注释：
[1] vaq bae yaemz：vaq 投胎，yaemz 快
[2] rox ngamz：懂事，知理，吸取教训
[3] ndij：和，与。同后文
[4] vanz aen：报恩
[5] doeg rengz：力气
[6] couh：才，couh baenz 才成
[7] nyaq：刚刚
[8] lauxsae：老麽公
[9] mehlaux uenj va：mehlaux 花婆/花母，壮族地区普遍供奉的一个神灵，安置于母亲房间里，日夜供奉；uenj va 护花，保佑子女的意思。与后文的mehlaux goek va 同义。
[10] caeuh：恢复